Skip to main content

Pa hóben

Tratamentu spesial pa hóben, pa prepará nan pa un estilo di bida nobo sin adikshon.

Tratamentu ambulante

Ambulante:  Esaki ta enserá ku un algun biaha pa siman bo ta bai FMA pa tratamentu i despues bo ta bai kas bèk. Pues bo ta keda den bo mes ambiente i bo por bai skol normal.

Bo ta úniko (BTU) + Bo ta úniko plùs (BTU Plus)
  • BTU 12 – 17 aña di edat
  • BTU plus  17 – 21 aña di edat

Meta di e programa ta pa yuda e partisipante tuma mihó desishon. Esaki basá riba e informashon ku e partisipantenan ta risibí durante di e programa, ku ta yuda nan yega na mihó komprondementu di nan komportashon, ku e resultado ku e partisipante lo tin mas resistensia kontra adikshon. Lo presentá e informashon na un manera dinámiko, i e partisipante lo por rekonosé su mes i ekspresá liber durante di e seshonnan. Komo ku e manera di interkambio di informashon ta interaktivo e partisipante lo ta kapas na sigui desaroyá su abilidatnan sosial.

E programa Bo ta Úniko/Bo ta Úniko Plùs, ta un programa ku ta duna atenshon na e aspektonan físiko, sosial, emoshonal i spiritual di e partisipante. Huntu ku esaki lo pone atenshon tambe na e partisipante su personalidat i e kualidatnan di su karakter ku ta di importansia pa yega na un kambio positivo. 

Meta:

  • Haña informashon tokante droga i adikshon.
  • Konosé bo mes mihó i deskubrí dikon bo ta úniko.
  • Siña tuma desishon huisioso.
  • Haña mas dominio riba bo emoshonnan.
  • Prevení rekaida.
  • Fiha meta.

Pa medio di e tratamentu bo ta siña entre otro:

  • Rekonosé situashon ku ta stimulá bo pa bai usa.
  • Atendé ku bo emoshonnan.
  • Fortifiká bo abilidatnan sosial.
  • Prevení rekaida.
  • Krea un estilo di bida nobo liber di droga.

Loke ta spera di bo:

  • Motivashon pa traha riba bo adikshon.
  • Miembro di famia ku ta dispuesto pa sostené e proseso di tratamentu.
  • Dispuesto pa laga hasi tèst di orina ku bo.
  • Durante di e tratamentu sigui bai skol òf traha normal.

Durashon di e tratamentu:

Ta definí durashon di e tratamentu despues di evaluashon di e kaso. Durashon di e tratamentu lo ta mas kòrtiku pa un hóben ku ta eksperimentá kompará ku un hóben ku ta hasi uso frekuente.

E promé parti di e tratamentu ta dura 4 pa 11 siman. E parti akí ta konsistí di seshon semanal den grupo i kada kinsena (dos siman) seshon individual. Despues ta sigui seshon di kuido posterior 1 bia pa luna. E periodo di kuido posterior ta dura 3 pa 6 luna.

E mayornan ta haña sosten durante di e tratamentu. Esaki por sosodé telefónikamente, den un seshon di grupo òf durante e seshonnan individual.

E tratamentu ta konsistí di kòmbersashon i ehersisio pa prepará bo pa un estilo di bida nobo, liber di adikshon. E tratamentu ta sosodé individual òf den grupo huntu ku otro hóben ku ta den e mes situashon ku bo. Asina boso por sostené otro durante di e proseso di tratamentu.  

Mini VIP + VIP

Mini VIP + VIP (VIP = Very Important Person)
  • Mini VIP 7-10 aña di edat
  • VIP 10 -12 aña di edat
Mini VIP i VIP ta programa ku den forma di wega ta duna sosten na mucha di 7 pa 12 aña ku ta biba den un ambiente kaminda tin adikshon.
Close Menu