Skip to main content

Empresa i skol

Sosten basá riba maneho di prevenshon na skol i boka di trabou.

Maneho di alkohòl i droga

Uso di supstansia ta enserá pone salú, bienestar i siguridat físiko di e usadó i su skol òf área laboral na riesgo. Un maneho di alkohòl i droga na skol, den empresa i organisashon ta funshoná preventivamente i ta minimalisá e konsekuensianan di uso di supstansia pa alumno/trahadó i e funshonamentu di skol i/òf realisashon di e metanan empresarial planiá.

Mester di yudansa!

Petishon pa yudansa den formulashon di maneho di alkohòl i droga

Skol: FMA tin un kolaborashon ku e direktivanan di skol pa loke ta maneho di alkohòl i droga.
Otro organisashon (empresa, instansia no lukrativo - non profit): por tuma kontakto ku FMA.

Tuma kontakto
Maneho di alkohòl i droga

Na trabou

Kiko maneho di droga i alkohòl na trabou ta enserá?
FMA ta ofresé empresa sosten na momento di desaroyá di un maneho di alkohòl i droga i implementashon di esaki.

Elemento ku regularmente ta forma parti di e kolaborashon:

  • Kòmbersashon ku gerensia tokante e maneho ku lo desaroyá i implementashon di esaki, i e importansia di prevenshon.
  • Informashon tokante uso di supstansia i e maneho ku lo implementá pa e personal kompleto.
  • Entrenamentu di e funshonario ehekutivo medio, asina por rekonosé e señalnan i sa kon mester aktua den kaso ku tin indikashon ku ta hasi uso di supstansia na boka di trabou.
  • FMA ta duna tratamentu na kolaboradó ku tin mester di esaki.
  • FMA ta reportá mensualmente, den konsulta ku e kolaboradó korespondiente, tokante progreso di e tratamentu.
Tuma kontakto
Maneho di alkohòl i droga

Na skol

Kiko e maneho di alkohòl i droga na skol ta enserá?

Ehekushon basá riba maneho:

  • E maneho ta duna e reglanan ku ta konta den kaso ku tin poseshon, ta hasi uso, ta bou di influensia, ta parti òf bende na skol. E direktiva di skol ta disidí kua situashon i lugá ta kai bou di e konteksto eskolar.
  • Ta posibel pa skrudiñá e alumnonan periódikamente, algu ku e mayornan ta duna pèrmit for di komienso di aña eskolar. 
  • E promé maneho di droga pa skol ta desaroyá pa Direktiva di Skolnan Katóliko basá riba konseho i den kolaborashon ku FMA.

Tin un prosedimentu ku ta stipulá ku loke mester sosodé den kaso ku tin indikashon di uso di supstansia òf den kaso ku skol ta preokupá ku funshonamentu di e alumno komo konsekuensia di (posibel) uso di supstansia.

Tambe ta palabrá ken ta enkargá ku señalá, guia, i eventualmente manda e alumno ku tin indikashon di ta hasi uso di supstansia pa FMA. Esaki ta den man di e tim di droga di skol, ku ta konsistí di diferente dosente ku ta spesialmente prepará pa esaki.

E maneho di prevenshon na skol ta konsistí di 6 parti:

1. Maneho:

Redaktá i stipulá e maneho ku ta bai konta pa e skol.

2. Informashon pa e tim di dosente:

FMA ta duna informashon na tur dosente kon pa señalá i ki akshon por tuma. 

3. Entrenamentu pa e tim di droga:

FMA ta duna entrenamentu na e tim di droga: un grupo di dosente motivá i enkargá ku maneho di droga, guia i skrudiñamentu di alumno.

4. Edukashon pa alumno:

E tim di peer educators ta duna informashon na tur klas. E peer educators ta konsistí di hóben di train pa duna informashon na hóben di nan edat.

5. Skrudiñamentu di droga:

FMA ta sostené skol den e promé skrudiñamentu di droga i den kòmbersashon ku mayor di e mucha ku a tèst positivo.

6. Tratamentu:

FMA ta guia i trata e alumno ku ta eksperimentá òf usa supstansia pa stòp ku e uso. 

Tuma kontakto

Enseñansa

Nos hóbennan ta den un edat ku nan ta hopi sensibel pa preshon di grupo i e gana pa eksperimentá. Esaki ta mas ku sufisiente motibu pa pone èkstra atenshon na prevenshon di uso di droga na skol. FMA den e kaso akí no ta pensa únikamente riba e alumno, pero ta duna un pakete kompleto di kua e personal di enseñansa tambe ta embolbí. 

Peer Educators

Peer Educators

Edukashon di hóben pa hóben

E tim di Peer Educators ta un grupo di boluntario ku ta konsistí hóben i hóben adulto dinámiko ku ta duna regularmente informashon tokante adikshon i preshon di grupo na skol i hóben di nan edat. Aki ta hasi uso di material oudiovisual, foyeto i diskushon den grupo.

Grupo meta:

  • Mucha ku ta bai skol
  • Enseñansa di fundeshi (grupo 6, 7, i 8)
  • Skol spesial
  • Skol sekundario
  • Hóben ku no ta bai skol
  • Aktividat despues di skol (Naschoolse opvang)
  • Skouting 
  • Grupo religioso i kultural di hóben
  • Sekundario: Instansia i organisashon ku ta hasi petishon pa e servisio di e peer educators (edukadó hóben) 

Trabou di e peer educators ta pará sentral den e totalidat. Ta skoke e peer educator for di e grupo meta.

Tuma kontakto