Pa Adulto

Pa Adulto

Tur adulto por bishitá FMA tantu pa tratamentu individual komo den grupo i pa atmishon. Tambe ta duna yudansa i sosten na famia i miembro di famia.

Tratamentu amublante

E kliente ambulante ta bishitá FMA 1 pa 2 biaha pa siman pa tratamentu, pero ta keda biba den su propio ambiente. Meta di e tratamentu akí ta pa e yuda e kliente yega na un estilo di bida nobo, kaminda e tin kontrol riba su adikshon. E tratamentu por tuma lugá individual òf den grupo, bou di guia di sikólogo i/òf trahadó sosial.

Kriterio pa tratamentu ambulante:

  1. Motivashon pa sigui e tratamentu.
  2. Persona di kontakto ku ta dispuesto pa sostené e tratamentu
  3. Aktividat diario den forma di trabou òf estudio.
  4. Stabilidat síkiko.

Atmishon

Na Speransa por interná e kliente (kuido residensial) òf e por sigui un programa partaim (semi-residensial). Keda pa un tratamentu na Speransa semper ta boluntario. 

Na Speransa por interná únikamente hende hòmber di 18 aña bai ariba. Hende muhé lo por partisipá na e seshon partaim.

Na Speransa ta bini na remarke pa tratamentu, hende ku tin problema di adikshon di tal gravedat ku tratamentu ambulante no ta posibel. E kliente mester tin un sierto nivel kognitivo di manera ku e por sigui e programa, tambe e mester ta kapas pa sigui traha òf sigui un estudio. E kliente mester ta motivá pa e traha riba su problema di adikshon i no tin mag di tin trastorno síkiko òf físiko grave.  

E kliente di Speransa mester tin un persona di kontakto i sosten di su ambiente sosial.  

Por ta interná den speransa pa un periodo di máksimo 1 aña.

Speransa ta ofresé:

  1. Desintoksikashon
  2. Residensial
  3. Semi residensial
  4. Kuido posterior
Tipo di tratamentu: Periodo:
Detoksifikashon 2 dia te 2 siman
Tratamentu residensial 10 te 12 luna
Tratamentu semi residensial (partaim) 4 te 6 luna
Kuido posterior 3 luna, 2x pa luna

Ta determiná e periodo di tratamentu di un kliente despues di e kòmbersashon di diagnóstiko; e periodo por varia segun kada situashon. Semper nos ta duna kuido adaptá na nesesidat di e kliente.

Sosten na famia

E grupo di sosten ta un programa pa famia i ser kerí di un persona ku problema di adikshon.

E persona ku problema di adikshon por ta un kliente ku ta siguiendo (na e momentonan ei) un tratamentu na FMA, pero tambe un persona ku ainda no a kuminsá su proseso di tratamentu.

Meta di e grupo akí:

E meta prinsipal di e programa ta pa duna guia i sosten na e partisipantenan di e grupo.

Edukashon di Famia

E grupo di edukashon di famia ta un programa pa mayor di hóben ku problema di adikshon.

Meta di e grupo akí ta pa:

  • Hasi e mayornan konsiente di e manera di eduká i konsekuensia di esaki.
  • Mehorá e edukashon.
  • Krea mihó komunikashon entre mayor i yu.

Seshon pa lista di espera (wachtlijstsessie)

Pa kliente ku ta warda riba un tratamentu ta organisá enkuentro kaminda entre otro ta traha riba nan motivashon i ta duna informashon tokante adikshon.