Tokante FMA

E sentro di konosementu riba tereno di prevenshon, tratamentu i kuido pa ku adikshon.

Tokante nos organisashon

FMA

Fundashon pa Maneho di Adikshon (FMA) ta fundá na aña 1995 bou di inisiativa di e Gobièrnu Insular di e tempu ei. E fundashon ta e sentro di konosementu riba tereno di prevenshon i tratamentu di adikshon na Kòrsou. 

FMA ta risibí supsidio di gobièrnu a base di palabrashon konkreto i responsabilisashon.

Nos Mishon

FMA ta promové i koordiná aktividat riba tereno di adikshon na un manera amplio i kualifiká, pa medio di: prevenshon, edukashon i tratamentu boluntario, den kolaborashon ku otro instansia.

Nos Vishon

FMA ta e sentro di konosementu na Kòrsou ku ta dirigí riba nesesidat di kliente. FMA ta traha riba prevenshon, duna edukashon i tratamentu for di un aserkamentu proaktivo i profeshonal, pa di e manera mas efektivo hasi e problemátika di adikshon mas manehabel.

Nos Grupo di Enfoke

Nos tei pa tur hende: hóben, adulto, mayornan i tambe muchanan ku ta biba den un ambiente di adikshon.

Nos grupo di enfoke

E tareanan prinsipal ta:

Tratamentu i guia di adikto, tantu di supstansia adiktivo komo kustumber.

Mantenshon di un punto sentral di registrashon pa kuido di adikto.

Pèrkurá pa por tin tratamentu i guia adekuá pa adikto.

Trayektoria di FMA

1995

A lanta Fundashon pa Maneho di Adikshon. E promé aporte di Gobièrnu Sentral a bini den forma di un donashon for di e Fondo di Kriminalidat. Fundashon pa Maneho di Adikshon (FMA) ta risibí 1.5 mion komo kapital inisial for di man di minister drs. Stanley Inderson.

1997

E sentro ‘porta habri’ (kaminda por kana drenta sin sita) pa adikto króniko, Dios Yudami, a kuminsá na 1997 ku e sùrnan di Schijdel, ku tabata parti kuminda pa esnan sin kas (daklos) den Scharloo i besindario. Mas despues a aserká FMA pa sosten, i asina FMA a tuma i amplia e trabounan di e sùrnan.

1997 te 2000

Na 1997 ofisialmente ta habri e ofisina di FMA den un edifisio na Saliña. Aki ta kuminsá ku registrashon di kliente, i pa promé biaha ta risibí supsidio di Gobièrnu Insular pa medio di un Kontrato di Kuido. FMA huntu ku Fundashon Hoop di Doordrecht, un outoridat riba tereno di kuido di adikshon, ta organisá e promé kurso básiko di kuido di adikshon pa su personal. Na aña 2000, FMA ku sosten tékniko di Fundashon Hoop, ta kuminsá atrobe ku registrashon elektróniko di kliente.

2000 te 2001

Na aña 2000, ku fondo di e programa di urgensia Jeugd en Jongeren di Hulanda, ta lanta kuido ambulante pa hóben, i na aña 2001 a sigui ku e departamento di kuido ambulante pa adulto. Na 2001 a introdusí e bùs LIBER, ku fondo di Reda Sosial. Un sentro mobil ‘porta habrí’, na benefisio di kuido den bario di Kòrsou.

2002

Na aña 2002, banda di e opshon pa kana drenta sin sita, Dios Yudami a kuminsá ku akohida parti anochi pa esnan ku adikshon króniko ku ta sin kas. E mes aña FMA i Stichting Hoop a tuma e inisiativa pa lanta Fundashon Speransa, fundashon ku e tempu ei tabata duna kuido 24/7 na hende hòmber.

2005

Na 2005 FMA i Aqualectra ta sera un akuerdo di kolaborashon ku tin komo meta prevenshon di adikshon na boka di trabou i tratamentu di empleado. Na mes momentu Aqualectra a bira un di e promé kompanianan lokal ku tin prevenshon di adikshon den nan kontrato kolektivo di trabou (CAO).

2005

FMA i Servisio di Kuido i Salubridat – Geneeskundige en Gezondheids Dienst (GGD) – ta hasi e investigashon ‘Paso a Paso’, ku meta pa haña un bista di resultado di e tratamentu di e personanan ku tabata inskribí komo kliente na FMA durante 2001 pa 2003. For di e investigashon a sali na kla ku mayoria di e èks klientenan ainda ta liber di e adikshon (clean) i por lo general a mustra progreso pa loke ta nan salú en general, funshonamentu sosial i den sirkunstansia laboral.

2007

Den kolaborashon ku Fundashon Material pa Skol i ku finansiamentu di Stichting Samenwerkende Fondsen voor de Nederlandse Antillen en Aruba, ta desaroyá un kuríkulo di prevenshon pa Enseñansa di Fundeshi.

2018

Ta likidá Fundashon Speransa i Speransa ta bira un departamento di Fundashon pa Maneho di Adikshon.

2018

Akuerdo di kooperashon entre Un Miho Mañan (UMM), Fundashon Sikiatria General Hospital dòkter David Ricardo Capriles i Dios Yudami (DY) departamento di Fundashon pa Maneho di Adikshon. Nan a bai huntu bou di un dak den e edifisio di Kranshi Bieu na Scharloo.

2020

Integrashon di FMA den Stichting GGz Curaçao.