Kiko ta adikshon?

Adikshon ta un malesa króniko di kua un persona ta físikamente i/òf mentalmente dependiente di un kustumber òf supstansia. Bou di kustumber nos por pensa riba palabra manera adikshon na wega di plaka, sèks i internet i pa loke ta supstansia: tabaku, alkohòl i droga.

Adikshon

Tin diferente fase ku ta hiba na adikshon:

1. Uso komo eksperimento

E hende ta kurioso pa e supstansia òf kustumber i ta bai purba esaki. E eksperimento ta temporal. Despues e hende ta stòp ku esaki òf ta bira un usuario sosial.

2. Uso sosial

E supstansia (òf kustumber) ta usá pa e efektonan positivo: E hende ta haña esaki dushi, relahante i plasentero.

3. Uso regular

Ta hasi uso di e supstansia (òf kustumber) ku un meta: E hende ta bai usa ku un motibu ku tin biaha tin di aber ku e desbalansa den nos áreanan di bida.

4. Uso eksesivo

E hende ta hasi uso di e supstansia (òf kustumber) pa reprimí sintimentu desagradabel òf problema. Kontrol riba uso ta kuminsá disminuí i tin ménos plaser.

5. Adikshon

Den e fase akí kasi tur kos ta basá riba uso di e supstansia (òf kustumber). E adikshon ta bai kompañá ku problema físiko, síkiko i sosial. E persona no tin kontrol mas riba e uso.

Adikshon ta un problema progresivo i lo bira pió si no risibí tratamentu. E ta algu króniko, tambe despues di finalisá un tratamentu e persona mester keda alerta pa señal di preshon interno. Rekaida ta un fenómeno komun den kaso di adikshon.