Skip to main content

Nos t’ei pa tur hende!

FMA ta trata diferente grupo di enfoke.

UT

Unidat di Tratamentu

E departamentu akí ta enkargá ku tratamentu ambulante di kliente. E kliente ambulante ta bishitá FMA 1 pa 2 biaha pa siman pa tratamentu, pero ta keda biba den su ambiente. Meta di e tratamentu akí ta pa e yuda e kliente yega na un estilo di bida nobo, kaminda e tin kontròl riba su adikshon. E tratamentu por tuma lugá individual òf den grupo, bou di guia di sikólogo i/òf trahadó sosial.

Kriterio pa tratamentu ambulante:

  1. Motivashon pa sigui e tratamentu.
  2. Persona di kontakto ku ta dispuesto pa sostené e tratamentu.
  3. Aktividat diario den forma di entre otro trabou òf estudio.
  4. Stabilidat síkiko.

Pa mucha:

Mini VIP + VIP (VIP = Very Important Person)
(VIP = Persona Sumamente Importante)
  • Mini VIP: 7 – 10 aña di edat
  • VIP: 10 – 12 aña di edat
Mini VIP i VIP ta programa ku den forma di wega ta duna sosten na mucha di 7 pa 12 aña ku ta biba den un ambiente kaminda tin adikshon.

Pa hóben:

Bo ta úniko (BTU) + Bo ta úniko plus (BTU Plus)
  • BTU 12 – 17 aña di edat
  • BTU plus  17 – 21 aña aña di edat

Meta di e programa ta pa yuda e partisipante tuma mihó desishon. Esaki basá riba e informashon ku e partisipantenan ta risibí durante di e programa, ku ta yuda nan yega na mihó komprondementu di nan komportashon, ku e resultado ku e partisipante lo tin mas resistensia kontra adikshon. Lo presentá e informashon na un manera dinámiko, i e partisipante lo por rekonosé su mes i ekspresá liber durante di e seshonnan. Komo ku e manera di interkambio di informashon ta interaktivo e partisipante lo ta kapas na sigui desaroyá su abilidatnan sosial.

E programa Bo ta Úniko/Bo ta Úniko Plùs, ta un programa ku ta duna atenshon na e aspektonan físiko, sosial, emoshonal i spiritual di e partisipante. Huntu ku esaki lo pone atenshon tambe na e partisipante su personalidat i e kualidatnan di su karakter ku ta di importansia pa yega na un kambio positivo. 

Pa famia:

Sosten na famia

E grupo di sosten ta un programa pa famia i ser kerí di un persona ku problema di adikshon.

E persona ku problema di adikshon por ta un kliente ku ta siguiendo (na e momentonan ei) un tratamentu na FMA, òf un persona ku ainda no a kuminsá su proseso di tratamentu.

Meta di e grupo akí:
E meta prinsipal di e programa ta pa duna guia i sosten na e partisipantenan di e grupo.

Edukashon di Famia

E grupo di edukashon di famia ta un programa pa mayor di hóben ku problema di adikshon.

Meta di e grupo akí ta pa:

  • Hasi e mayornan konsiente di e manera di eduká i konsekuensia di esaki.
  • Mehorá e edukashon.
  • Krea mihó komunikashon entre mayor i yu.
Kontakto

Speransa

Speransa ta un sentro di rehabilitashon ku ta enfoká riba transformashon di e areanan sosial, emoshonal, spiritual i fisiko di e kliente.

Na Speransa tantu hende homber komo hende muhe por sigui un tratamentu residensial òf  semi-residensial. Ttratamentu na Speransa semper ta boluntario.

Na Speransa ta bini na remarke pa tratamentu, klientenan di 18 ana bai ariba ku tin problema di adikshon di tal gravedat ku tratamentu ambulante no ta posibel. E kliente mester tin un sierto nivel kognitivo i alabes dispone di kapasidat fisiko di manera ku e por sigui e programa. E kliente mester ta motivá pa e traha riba su problema di adikshon i no tin mag di tin trastorno síkiko grave. 

E kliente di Speransa mester tin un persona di kontakto i sosten di su ambiente sosial.

Por keda interná den Speransa pa un periodo máksimo di 1 aña.

Nos programa ta ofresé un variedat di aktividat struktural pa alkansá e meta prinsipal kual ta apstinensia total di adikshon. E programa di tratamentu ta ofresé ekspreshon atraves di pintamentu, deporte, trabou sosial, guia spiritual, terapia kreativo, guia, desaroyo di abilidat sosial, prevenshon di rekaida, guia indiividual i mas.

Tantu e kliente komo e famia ta risibí yudansa profeshonal.

Nos lema ta: “Transformashon; bo desishon i nos mishon.”

Speransa ta ofresé:

  1. Detoksifikashon
  2. Residensial
  3. Semi residensial
  4. Kuido posterior 
Tipo di tratamentu: Periodo:
Detoksifikashon 2 te ku 4 siman
Residensial 6 te ku 12 luna
Semi residensial 4 te ku 6 luna
Kuido posterior (despues di tratamentu) 3 luna

Pa klientenan ku ta ser referi dor di kompanianan ku tin un akuerdo mutuo ku  FMA basa riba maneho di droga & alkohol, Speransa ta ofrese un trayekto adapta di 4 luna.
Ta determiná e periodo di tratamentu di un kliente despues di e kòmbersashon di diagnóstiko; e periodo por varia segun kada situashon. Semper nos ta duna kuido adaptá na nesesidat di e kliente.

Kontakto

Dios Yudami

Dios Yudami ta ofresé pasadia (‘Porta Habrí) na adikto króniko ku ta kana zuèrf den sentro di siudat. Aki e adikto por bini tur dia (7 dia pa siman) pa kuminda grátis, posibilidat pa baña, haña paña limpi, feita i kòrta kabei. Di manera ku e ta kustumbrá na mas higiena i regularidat, i alabes aporta pa tin ménos molèster riba kaya.
E klientenan por bin di  8’or di mainta te ku mitar di 4  di atardi na Dios Yudami.

E pakete di servisio di Dios Yudami ta konsistí di:

  • Intermediashon pa karnèt di SVB i sédula.
  • Suministrashon di remedi.
  • Temanan siko-edukativo.
  • Aktividatnan sosial.
Kontakto

Training en Voorlichting

E departamento akí ta ofresé un pakete di servisio dirigí riba entre otro empresa, organisashon i skol.

E servisionan ta:

  1. Duna informashon
  2. Entrenamentu, kurso, tayer i charla
  3. Konseho, guia i informashon relashoná ku alkohòl i maneho di droga.
  4. Informashon (seshon di informashon)

Edukashon di hóben pa hóben (Peer Education)

E tim di Peer Educators (edukadó hóben) ta un grupo di boluntario, ku ta konsistí di hóben i hóben adulto dinámiko, ku regularmente ta duna informashon tokante adikshon i preshon di grupo na skol i hóben di nan edat. Aki ta hasi uso di material oudiovisual, foyeto i diskushon den grupo.

Grupo meta:

  • Mucha ku ta bai skol
  • Enseñansa di fundeshi (grupo 6, 7, i 8)
  • Skol spesial
  • Skol sekundario
  • Hóben ku no ta bai skol
  • Aktividat despues di skol (Naschoolse opvang)
  • Skouting 
  • Grupo religioso i kultural di hóben
  • Sekundario: Instansia i organisashon ku ta hasi petishon pa e servisio di e peer educators (edukadó hóben) 

Trabou di e peer educators ta pará sentral den e totalidat. Ta skoke e peer educator for di e grupo meta.

Kontakto